नंदुरबार : हिंदवी स्वराज्याचे संस्थापक छत्रपती शिवाजी महाराज यांच्या तिथीनुसार ३५३ व्या शिवराज्याभिषेक दिनानिमित्त नंदुरबार शहरात भव्य मिरवणूक आणि शिवकालीन युद्धकला अर्थात मर्दानी खेळाच्या चित्तथरारक प्रात्यक्षिकांचे आयोजन करण्यात आले आहे. हिंदु सेवा सहाय्य समितीच्या वतीने शनिवार, दि. २७ जून रोजी हा सोहळा उत्साहात साजरा केला जाणार आहे.
या कार्यक्रमाची सुरुवात दुपारी ४.३० वाजता छत्रपती शिवाजी महाराज नाट्य मंदिर येथे अभिषेक पूजनाने होणार आहे. त्यानंतर छत्रपती शिवाजी महाराज यांच्या प्रतिमेची पालखी शोभायात्रा, धर्मवीर संभाजीराजे यांच्या बलिदानाचा जिवंत देखावा तसेच शिवकालीन युद्धकलेची आकर्षक प्रात्यक्षिके सादर करण्यात येणार आहेत.
मिरवणूक छत्रपती शिवाजी महाराज नाट्य मंदिर येथून प्रारंभ होऊन मोठा मारुती मंदिर, शक्ती सागर चौक, दादा गणपती, काका गणपती, सिद्धिविनायक चौक, मंगळ बाजार, शिवस्मारक (जुनी नगरपालिका), अंधारे स्टॉप मार्गे पुन्हा नाट्य मंदिर येथे पोहोचणार आहे. याठिकाणी पूजन व महाआरतीने कार्यक्रमाचा समारोप होईल.
शिवराज्याभिषेक दिनानिमित्त आयोजित या सोहळ्यात शिवप्रेमी, युवक, महिला तसेच सर्व नागरिकांनी मोठ्या संख्येने सहभागी व्हावे, असे आवाहन हिंदु सेवा सहाय्य समितीच्या वतीने करण्यात आले आहे. शहरात शिवभक्तीचे आणि राष्ट्रप्रेमाचे वातावरण निर्माण करणारा हा सोहळा आकर्षणाचे केंद्र ठरणार असल्याचे आयोजकांनी सांगितले.