शनिमांडळ येथे विधिवत पूजन; शेतकरी व ग्रामस्थांशी साधला संवाद

नंदुरबार : राज्यातील दुष्काळाचे संकट दूर होऊन शेतकरी आणि नागरिकांना पाणीटंचाईचा सामना करावा लागू नये, तसेच आगामी काळात योग्य पर्जन्यमान व्हावे, यासाठी माजी आदिवासी विकास मंत्री तथा भाजपाचे विद्यमान आमदार डॉ. विजयकुमार गावित यांनी शनि अमावस्येनिमित्त नंदुरबार तालुक्यातील श्रीक्षेत्र शनिमांडळ येथे शनिदेवाचे विधिवत पूजन करून साकडे घातले.

शनिमहाराजांचे दर्शन घेतल्यानंतर डॉ. गावित यांनी शनिमांडळ, तलवाडे आणि तिलाली शिवारातील शेतकरी व ग्रामस्थांशी संवाद साधला. यावेळी त्यांनी नागरिकांच्या अडचणी आणि समस्या जाणून घेतल्या. आगामी काळात पाणीटंचाई निर्माण झाल्यास शेतकरी व ग्रामस्थांनी कोणती दक्षता घ्यावी, तसेच उपलब्ध पाण्याचा योग्य वापर आणि आवश्यक उपाययोजनांबाबत त्यांनी मार्गदर्शन केले.

शनिक्षेत्रातील सुविधांबाबत चर्चा

श्रीक्षेत्र शनिमांडळ येथे दर्शनासाठी येणाऱ्या भाविकांना कोणत्याही अडचणींचा सामना करावा लागू नये, तसेच मंदिर परिसरातील मोकळ्या जागेत भाविकांना सुलभपणे दर्शन घेता यावे, यासाठी आवश्यक सोयी-सुविधांबाबतही यावेळी चर्चा करण्यात आली.

राज्यातील शेतकरी आणि सर्वसामान्य नागरिकांना पावसाची प्रतीक्षा असताना डॉ. गावित यांनी शनि अमावस्येच्या निमित्ताने शनिदेवाच्या चरणी प्रार्थना केली. यावेळी धार्मिक विधींसोबतच स्थानिक शेतकरी व ग्रामस्थांशी संवाद साधून त्यांच्या समस्यांची माहिती घेतल्याने परिसरातील विविध प्रश्नांवर चर्चा झाली.

या प्रसंगी भाजपाच्या अनुसूचित जमाती मोर्चाच्या प्रदेश उपाध्यक्ष तथा जिल्हा परिषदेच्या माजी अध्यक्षा डॉ. सुप्रिया गावित, माजी जिल्हा परिषद सदस्य प्रवीण पाटील, शनी मंदिराचे सदस्य तथा सामाजिक कार्यकर्ते जगदीश पाटील यांच्यासह ग्रामस्थ, पदाधिकारी आणि कार्यकर्ते मोठ्या संख्येने उपस्थित होते.