उधना–पुणे अमृत भारत एक्स्प्रेसला मंजुरी; राजकीय श्रेयासाठी भाजप–शिवसेनेत दावे, मात्र जनतेतून सुविधेचे स्वागत
नंदुरबार (प्रतिनिधी) : नंदुरबार जिल्ह्यातील प्रवाशांची अनेक वर्षांची पुणे रेल्वेसेवेची प्रतीक्षा आता संपण्याच्या मार्गावर आहे. मध्य व पश्चिम रेल्वे विभागाकडून उधना–पुणे अमृत भारत एक्स्प्रेस नंदुरबारमार्गे सुरू करण्यास मंजुरी मिळाल्याची माहिती समोर आली असून, या निर्णयामुळे नंदुरबारसह धुळे, जळगाव, अमळनेर परिसरातील प्रवाशांना मोठा दिलासा मिळणार आहे.
या रेल्वेसेवेच्या मंजुरीनंतर मात्र तिच्या पाठपुराव्याचे श्रेय घेण्यासाठी महायुतीतील घटक पक्षांमध्ये राजकीय दावे-प्रतिदावे सुरू झाले आहेत. भाजपकडून माजी खासदार डॉ. हिनाताई गावित यांनी खासदारकीच्या कार्यकाळात रेल्वेमंत्री व रेल्वे प्रशासनाकडे सातत्याने पत्रव्यवहार करून पाठपुरावा केल्याचे सांगितले जात आहे. तर शिवसेना (शिंदे गट) यांच्याकडून विधान परिषद सदस्य आ. चंद्रकांत रघुवंशी यांनीही रेल्वे राज्यमंत्री तसेच पश्चिम रेल्वेच्या वरिष्ठ अधिकाऱ्यांकडे निवेदने देऊन सातत्याने पाठपुरावा केल्याचा दावा करण्यात आला आहे.
मात्र, ही रेल्वे कोणाच्या पाठपुराव्यामुळे मंजूर झाली, यापेक्षा ती प्रत्यक्षात नंदुरबारकरांच्या सेवेत कधी दाखल होते, हेच सर्वसामान्य प्रवाशांसाठी अधिक महत्त्वाचे ठरणार आहे.
नंदुरबार जिल्ह्यातील विद्यार्थी, व्यापारी, नोकरदार, कामगार, व्यावसायिक तसेच पुणे येथे विविध कामांसाठी नियमित प्रवास करणाऱ्या नागरिकांना सध्या रेल्वेच्या मर्यादित पर्यायांमुळे मोठ्या अडचणींचा सामना करावा लागतो. पुणे हे शिक्षण, रोजगार, व्यवसाय, उद्योग आणि वैद्यकीय सेवांचे महत्त्वाचे केंद्र असल्याने नंदुरबारहून थेट किंवा सोयीची रेल्वेसेवा उपलब्ध व्हावी, अशी मागणी अनेक वर्षांपासून होत होती.
प्रस्तावित उधना–पुणे अमृत भारत एक्स्प्रेस उधना येथून सुटल्यानंतर नंदुरबार, अमळनेर, जळगाव, चाळीसगाव, मनमाड, कोपरगाव/श्रीरामपूर, अहिल्यानगर, दौंड आणि हडपसरमार्गे पुण्याशी जोडली जाणार असल्याचे सांगितले जात आहे. अंतिम गाडी क्रमांक, वेळापत्रक, थांबे आणि संचालनाचे नियोजन रेल्वे प्रशासनाकडून अंतिम करण्यात येणार आहे.
अमृत भारत श्रेणीतील रेल्वेसेवेमुळे प्रवाशांना आधुनिक कोच, सुधारित आसनव्यवस्था, चार्जिंगसह विविध प्रवासी सुविधा मिळण्याची अपेक्षा आहे. त्यामुळे नंदुरबार जिल्ह्याच्या दृष्टीने ही केवळ नवीन रेल्वेगाडी नसून शिक्षण, रोजगार, व्यापार आणि दळणवळणाला चालना देणारी महत्त्वाची कनेक्टिव्हिटी ठरू शकते.
दरम्यान, रेल्वेसेवेच्या मंजुरीनंतर भाजप आणि शिवसेना या महायुतीतील दोन्ही घटक पक्षांच्या समर्थकांकडून आपापल्या नेत्याच्या पाठपुराव्याचे महत्त्व अधोरेखित केले जात आहे. मात्र, या श्रेयवादापेक्षा नंदुरबारच्या जनतेला मिळणारी सुविधा केंद्रस्थानी असावी, अशी सर्वसामान्य नागरिकांची भूमिका असल्याचे चित्र आहे.
“रेल्वे कोणामुळे आली, यावर राजकारण करण्यापेक्षा ती वेळेत सुरू झाली पाहिजे, नियमित चालली पाहिजे आणि प्रवाशांना त्याचा प्रत्यक्ष लाभ मिळाला पाहिजे,” अशी भावना प्रवासी, व्यापारी आणि नागरिकांकडून व्यक्त होत आहे.
वर्षानुवर्षांच्या मागणीनंतर पुण्याशी रेल्वे कनेक्टिव्हिटीचा मार्ग मोकळा होत असेल, तर त्याचा आनंद सर्वांनी घ्यावा; श्रेयाच्या राजकारणापेक्षा जनतेच्या प्रवासाचा प्रश्न महत्त्वाचा आहे, अशीच सर्वसाधारण जनभावना या निमित्ताने पुढे येत आहे.