नंदुरबार (प्रतिनिधी) जिल्ह्याचे भाग्यविधाते, जिल्हा निर्मितीचे शिल्पकार आणि जनतेच्या हृदयात स्थान निर्माण करणारे माजी मंत्री तथा विद्यमान आमदार डॉ. विजयकुमार गावित साहेब यांच्यावर नाशिक येथे दि. ८ जानेवारी रोजी हृदयविकाराची शस्त्रक्रिया यशस्वीरित्या पार पडली. त्यानंतर अधिक उपचारासाठी त्यांना मुंबई येथे हलविण्यात आले. सध्या देवाच्या कृपेने साहेबांची प्रकृती स्थिर असून सुधारणा होत असल्याचे समजते. ही बातमी ऐकताच संपूर्ण जिल्ह्यातील कार्यकर्ते, समर्थक व सामान्य नागरिकांमध्ये दिलासा आणि आनंदाचे वातावरण पसरले आहे.
डॉ. विजयकुमार गावित साहेब लवकरात लवकर पूर्णपणे बरे व्हावेत, त्यांना दीर्घायुष्य लाभावे व पुन्हा एकदा त्यांच्या हातून जनतेची सेवा घडावी, या सद्भावनेतून आज शनिवार, दि. ३१ जानेवारी २०२६ रोजी सकाळी ६.३० ते ८.३० या वेळेत शनिमहाराज मंदिरात, शनिमांडळ, तिलाली व तलवाडे खु येथील १०१ ग्रामस्थांच्या हस्ते रुद्राभिषेक व महामृत्युंजय पूजेचे आयोजन करण्यात आले.
या धार्मिक विधीप्रसंगी गावातील माजी जिल्हा परिषद सदस्य मुन्ना दादा पाटील, तिघ गावांचे सरपंच व उपसरपंच, ज्येष्ठ नागरिक, समस्त भाजपा कार्यकर्ते तसेच गावित साहेबांवर मनापासून प्रेम करणारे असंख्य कार्यकर्ते व नागरिक मोठ्या संख्येने उपस्थित होते. सर्वांनी एकमुखाने साहेबांच्या प्रकृतीसाठी प्रार्थना करत “लवकर बरे व्हा साहेब” अशा भावना व्यक्त केल्या.
डॉ. विजयकुमार गावित साहेब केवळ एक लोकप्रतिनिधी नसून आदिवासी भागाचा आवाज, सामान्य माणसाचा आधार आणि विकासाची दिशा दाखवणारे नेतृत्व आहेत. त्यांच्या तब्येतीबाबत जिल्ह्यातील तसेच राज्यातील कार्यकर्त्यांमध्ये असलेला जिव्हाळा आजच्या या पूजाविधीतून भावनिकरीत्या व्यक्त झाला. साहेबांच्या आरोग्यासाठी संपूर्ण जिल्हा प्रार्थनेत सहभागी झाल्याचे चित्र यावेळी पाहायला मिळाले.
“साहेब लवकर बरे व्हा, पुन्हा जनतेच्या सेवेत सक्रिय व्हा,” हीच भावना आज नंदुरबार जिल्ह्यातील प्रत्येक कार्यकर्त्याच्या मनात दाटून आलेली आहे.