नंदुरबार : सोशल मीडियावर हातात तलवार घेऊन व्हिडिओ प्रसारित करत नागरिकांमध्ये दहशतीचे वातावरण निर्माण करणाऱ्या युवकाविरुद्ध नंदुरबार शहर पोलिसांनी तातडीची कारवाई करत त्याला अटक केली असून त्याच्या ताब्यातील लोखंडी तलवार जप्त करण्यात आली आहे. या प्रकरणी महाराष्ट्र पोलीस अधिनियम तसेच भारतीय हत्यार अधिनियमांतर्गत गुन्हा दाखल करण्यात आला असून पुढील तपास सुरू आहे.
पोलीस अधीक्षक श्रीमती अश्विनी सानप, अपर पोलीस अधीक्षक आशीत कांबळे यांच्या मार्गदर्शनाखाली तसेच उपविभागीय पोलीस अधिकारी हनुमंत गायकवाड यांच्या सूचनेनुसार नंदुरबार शहरातील कायदा व सुव्यवस्था अबाधित राखण्यासाठी आणि गुन्हेगारी प्रवृत्तींवर प्रभावी नियंत्रण ठेवण्यासाठी विशेष मोहिम राबविण्यात येत आहे.
याच मोहिमेअंतर्गत १ ऑगस्ट २०२६ रोजी रात्री सुमारे ८ वाजता नंदुरबार शहर पोलीस ठाण्याच्या गुन्हे शोध पथकाला गोपनीय माहिती मिळाली की, हलवाई गल्ली परिसरात एक युवक हातात लोखंडी तलवार घेऊन फिरत असून त्याचा व्हिडिओ सोशल मीडियावर व्हायरल करून नागरिकांमध्ये भीती निर्माण केली जात आहे. माहिती मिळताच पोलिसांनी तात्काळ घटनास्थळी धाव घेत संबंधित युवकाला ताब्यात घेतले. झडतीदरम्यान त्याच्याकडून एक लोखंडी तलवार जप्त करण्यात आली.
या प्रकरणी कासीम मुस्ताक हलवाई (वय २७, रा. बोडगाव, ता. जि. नंदुरबार) याच्याविरुद्ध महाराष्ट्र पोलीस अधिनियम, १९५१ मधील कलम ३७(१)(३) सह कलम १३५ तसेच भारतीय हत्यार अधिनियम, १९५९ मधील कलम ४/२५ अन्वये नंदुरबार शहर पोलीस ठाण्यात गुन्हा नोंद करण्यात आला असून पुढील तपास सुरू आहे.
ही कारवाई प्रभारी पोलीस निरीक्षक संदीप पाटील यांच्या मार्गदर्शनाखाली पोलीस उपनिरीक्षक अमोल देशमुख, पोलीस हवालदार जगदीश पाटील तसेच पोलीस कॉन्स्टेबल रुपेश पगारे, राजेंद्र कटके, ललित गवळी, अमित भरवाड, राहुल राठोड आणि निंबा वाघमोडे यांच्या पथकाने केली.
दरम्यान, नंदुरबार शहर पोलीस हद्दीत विनापरवाना वास्तव्य करणाऱ्या हद्दपार इसमांविरुद्ध महाराष्ट्र पोलीस अधिनियमाच्या कलम १४२ अन्वये तसेच चोरीची मालमत्ता बाळगणाऱ्यांविरुद्धही सातत्याने कारवाई सुरू असल्याचे पोलिसांनी स्पष्ट केले आहे.
◆◆ नागरिकांना पोलिसांचे आवाहन ◆◆
सोशल मीडियावर प्रसिद्धी मिळविण्यासाठी किंवा दहशत निर्माण करण्याच्या उद्देशाने घातक शस्त्रांचे प्रदर्शन करणे हा गंभीर आणि दंडनीय गुन्हा आहे. अशा कृत्यांना कोणतीही सहानुभूती दाखविण्यात येणार नाही. सार्वजनिक ठिकाणी कोणीही बेकायदेशीररीत्या घातक शस्त्र बाळगत असल्याचे किंवा सोशल मीडियावर अशा प्रकारचे व्हिडिओ, रील्स अथवा पोस्ट प्रसारित होत असल्याचे आढळल्यास नागरिकांनी तात्काळ ११२ या आपत्कालीन क्रमांकावर किंवा जवळच्या पोलीस ठाण्याशी संपर्क साधावा, असे आवाहन नंदुरबार शहर पोलिसांनी केले आहे.