नंदुरबार : नंदुरबार जिल्हा पोलीस दलाच्या स्थानिक गुन्हे शाखेत कार्यरत असताना आपल्या बुद्धी-कौशल्याने, तपासातील अनुभवाने आणि गोपनीय बातमीदारांच्या माध्यमातून मिळालेल्या माहितीच्या आधारे अनेक गुंतागुंतीचे व क्लिष्ट गुन्हे उघडकीस आणणारे पोलीस अंमलदार श्री. अभय शशिकांत राजपूत यांच्या उल्लेखनीय कार्याची दखल घेत त्यांना ‘सरदार वल्लभभाई पटेल कार्य गौरव पुरस्कार-२०२६’ प्रदान करून विशेष सन्मान करण्यात आला.
धुळे येथील गुरुकुल फाउंडेशनच्या वतीने आयोजित कार्यक्रमात अभय राजपूत यांच्या उल्लेखनीय पोलीस सेवेचा गौरव करण्यात आला. गंभीर गुन्ह्यांचा तपास, आरोपींचा माग काढणे तसेच विविध महत्त्वपूर्ण पोलीस कारवायांमध्ये त्यांनी बजावलेल्या उल्लेखनीय भूमिकेबद्दल त्यांना हा मानाचा पुरस्कार देऊन सन्मानित करण्यात आले.
स्थानिक गुन्हे शाखेत कार्यरत असताना अभय राजपूत यांनी घरफोडी, चोरी, खून, दरोडा, जबरी चोरी यांसह विविध गंभीर स्वरूपाच्या गुन्ह्यांचा तपास करून अनेक गुन्हे उघडकीस आणण्यात महत्त्वपूर्ण भूमिका बजावली आहे. अनेक वेळा गुन्ह्यांचा तपास अत्यंत आव्हानात्मक आणि क्लिष्ट असतानाही त्यांनी गोपनीय माहिती, तपास कौशल्य आणि बारकाईने केलेल्या निरीक्षणाच्या आधारे गुन्ह्यांचा छडा लावण्यात यश मिळविले.
गुन्हे उघडकीस आणताना त्यांनी दाखविलेली तत्परता, बुद्धिमत्ता, अचूक नियोजन, तपासातील सातत्य आणि कर्तव्याप्रती असलेली निष्ठा यामुळे त्यांच्या कार्याची वेगळी ओळख निर्माण झाली आहे. विविध मोठ्या कारवायांमध्ये त्यांनी बजावलेल्या महत्त्वपूर्ण भूमिकेमुळे नंदुरबार जिल्हा पोलीस दलाच्या नावलौकिकात भर पडली आहे.
अभय राजपूत यांच्या या उल्लेखनीय कार्याची दखल घेत गुरुकुल फाउंडेशन, धुळे यांच्या वतीने त्यांना ‘सरदार वल्लभभाई पटेल कार्य गौरव पुरस्कार-२०२६’ प्रदान करण्यात आला. पुरस्कार स्वीकारताना त्यांच्या कर्तृत्वाचा गौरव करत त्यांना विशेष सन्मानित करण्यात आले. त्यांच्या पोलीस सेवेत केलेल्या उल्लेखनीय कार्याला मिळालेला हा सन्मान निश्चितच त्यांच्या सहकाऱ्यांसाठी आणि मित्रपरिवारासाठी अभिमानाची बाब ठरली आहे.
या पुरस्काराने सन्मानित झाल्याबद्दल पोलीस अंमलदार अभय शशिकांत राजपूत यांचे मित्रपरिवार, सहकारी, हितचिंतक आणि नागरिकांकडून मनःपूर्वक अभिनंदन करण्यात येत असून, त्यांच्या पुढील सेवाकाळासाठी हार्दिक शुभेच्छा व्यक्त होत आहेत.