नंदुरबार (प्रतिनिधी) लोकशाही प्रक्रियेची ओळख विद्यार्थ्यांना प्रत्यक्ष अनुभवातून करून देण्यासाठी एकलव्य विद्यालयातील इयत्ता १० वी ‘क’ च्या वर्गात ईव्हीएम (EVM) अॅपद्वारे वर्ग प्रतिनिधी निवडणुकीचा अभिनव उपक्रम राबविण्यात आला. मोबाईलवरील ईव्हीएम अॅपचा वापर करून मतदानाची प्रक्रिया पार पडली आणि विद्यार्थ्यांनी उत्स्फूर्त सहभाग घेत लोकशाहीचा अनुभव घेतला.
शालेय जीवनात वर्ग प्रतिनिधी (मॉनिटर) निवडीसाठी पारंपरिक पद्धतीने चिठ्ठीद्वारे मतदान केले जाते. मात्र यावेळी आधुनिक तंत्रज्ञानाचा वापर करून विद्यार्थ्यांना प्रत्यक्ष निवडणूक प्रक्रियेची अनुभूती देण्यात आली. मतदानापूर्वी वर्गशिक्षक संतोष पाटील यांनी मतदानाची संपूर्ण प्रक्रिया, मतदानाचे महत्त्व आणि मतदारांनी पाळावयाचे नियम याबाबत सविस्तर मार्गदर्शन केले.
त्यानंतर इच्छुक उमेदवारांची नावे ईव्हीएम अॅपमध्ये नोंदवून विद्यार्थ्यांनी शिस्तबद्ध पद्धतीने मतदानाचा हक्क बजावला. प्रत्यक्ष मतदान केंद्राप्रमाणेच संपूर्ण वातावरण तयार करण्यात आले होते. या उपक्रमासाठी विद्यालयाचे मुख्याध्यापक धर्मेंद्र मराठे, उपमुख्याध्यापक डॉ. गिरीश पवार तसेच पर्यवेक्षक टिका पाडवी यांनी सक्रिय सहभाग घेत विद्यार्थ्यांना प्रोत्साहन दिले.
विद्यार्थिनी गटातून श्वेता पवार, रिद्धिमा मालचे, राधिका भोये आणि रिषिका राव यांनी उमेदवारी अर्ज दाखल केले होते. त्यामध्ये श्वेता पवार वर्ग प्रतिनिधी तर रिद्धिमा मालचे उपवर्ग प्रतिनिधी म्हणून निवडून आल्या. विद्यार्थी गटातून श्रेयस बोरसे, दुर्गेश माळी, हर्ष काळे आणि स्वप्निल वाघ यांनी निवडणूक लढविली. त्यामध्ये श्रेयस बोरसे वर्ग प्रतिनिधी तर दुर्गेश माळी उपवर्ग प्रतिनिधी म्हणून विजयी झाले.
या अभिनव उपक्रमामुळे विद्यार्थ्यांना लोकशाही निवडणूक प्रक्रियेचा प्रत्यक्ष अनुभव मिळाला. भविष्यात जबाबदार आणि सजग मतदार घडविण्यासाठी अशा उपक्रमांचे महत्त्व अनन्यसाधारण असल्याची भावना विद्यार्थ्यांनी व्यक्त केली.