नंदुरबार – जनतेच्या आरोग्याशी थेट संबंधित असलेल्या जननायक बिरसा मुंडा शासकीय वैद्यकीय महाविद्यालयात सुरू असलेल्या कथित गैरव्यवहारांनी संतापाची लाट उसळली आहे. गोरगरीब रुग्णांचे आधारस्थान असलेल्या या संस्थेत भरती प्रक्रियेत मोठ्या प्रमाणावर अनियमितता, भ्रष्टाचार आणि प्रशासकीय निष्काळजीपणा झाल्याची चर्चा जोर धरत आहे.
महाविद्यालयाचे अधिष्ठाता डॉ. संजय राठोड यांच्या कार्यशैलीवर गंभीर प्रश्न उपस्थित होत असून, कंत्राटी भरतीत पारदर्शकतेचा पूर्ण अभाव, नियमबाह्य नियुक्त्या आणि संशयास्पद आर्थिक व्यवहार यामुळे संपूर्ण प्रक्रिया संशयाच्या भोवऱ्यात सापडली आहे. कोणतीही अधिकृत निविदा प्रक्रिया न राबविता करण्यात आलेली महागडी संगणक खरेदी हा देखील गंभीर गैरप्रकार मानला जात आहे. “या खरेदीला परवानगी कोणी दिली?” हा प्रश्न अद्याप अनुत्तरित आहे.
याशिवाय स्वच्छता ठेकेदारांना करण्यात आलेले अवाजवी देयके, केवळ नाममात्र उपस्थिती दाखवून मानधन घेणारे प्राध्यापक, सेवा न देता वेतन घेणारे तज्ज्ञ डॉक्टर, तसेच कर्मचाऱ्यांकडून अनुपस्थितीचा मोबदला वसूल करण्याचे प्रकार हे सर्व प्रशासनातील भ्रष्टाचाराचे गंभीर स्वरूप दर्शवतात. इतकेच नव्हे तर, संस्थेच्या इमारतीची नियमित पाहणीसारखी मूलभूत जबाबदारीही अधिष्ठात्यांकडून पार पाडली जात नसल्याचे समोर येत आहे.
राज्याचे वैद्यकीय शिक्षण मंत्री श्री हसन मुश्रीफ यांच्या नंदुरबार भेटीदरम्यान या प्रकरणाची चर्चा रंगली होती. जिल्हाधिकारी डॉ. मिताली सेठी यांना चौकशीचे आदेश देण्यात आले असले तरी अद्याप ठोस कारवाई न झाल्याने हे प्रकरण दडपण्याचा प्रयत्न होत असल्याचा संशय व्यक्त केला जात आहे.
या पार्श्वभूमीवर आता मुख्यमंत्री, दोन्ही उपमुख्यमंत्री, मुख्य सचिव तसेच वैद्यकीय शिक्षण विभागाने स्वतः पुढाकार घेऊन उच्चस्तरीय, निष्पक्ष व वेळबद्ध चौकशी करावी, अशी जोरदार मागणी नागरिकांतून होत आहे. दोषी अधिकारी व कर्मचाऱ्यांना तत्काळ निलंबित करून त्यांच्यावर कठोर प्रशासकीय कारवाई करावी आणि संबंधितांविरुद्ध फौजदारी गुन्हे दाखल करावेत, अशीही ठाम मागणी पुढे येत आहे.
आरोग्य व्यवस्थेवरील जनतेचा विश्वास टिकवण्यासाठी अशा गंभीर आरोपांची सखोल चौकशी करून दोषींना शिक्षा करणे अत्यावश्यक आहे. अन्यथा जनतेसाठी उभारलेली ही व्यवस्था काही मोजक्या लोकांच्या स्वार्थाचे साधन बनत असल्याची भावना अधिक तीव्र होईल.