नंदुरबार : नंदुरबार जिल्ह्याच्या राजकीय, सामाजिक आणि विकासात्मक वाटचालीत मोलाचे योगदान देणारे माजी मंत्री तथा विद्यमान आमदार डॉ. विजयकुमार गावित यांच्या कन्या, संसदरत्न माजी खासदार डॉ. हिना गावित यांच्या भगिनी आणि नंदुरबार जिल्हा परिषदेच्या माजी अध्यक्षा डॉ. सुप्रियाताई विजयकुमार गावित यांची भारतीय जनता पार्टी अनुसूचित जमाती (एसटी) मोर्चाच्या महाराष्ट्र प्रदेश उपाध्यक्षपदी नियुक्ती करण्यात आली आहे. या नियुक्तीमुळे नंदुरबार जिल्ह्यासह संपूर्ण नाशिक विभागातील भारतीय जनता पक्षाच्या पदाधिकारी व कार्यकर्त्यांमध्ये आनंदाचे वातावरण असून सर्वत्र जल्लोष साजरा करण्यात येत आहे.
डॉ. सुप्रियाताई गावित यांनी जिल्हा परिषद अध्यक्षा म्हणून काम करताना विकासाभिमुख दृष्टीकोन, जनतेशी सातत्याने ठेवलेला संवाद आणि सर्वसामान्यांच्या प्रश्नांबाबतची संवेदनशीलता यामुळे स्वतःची वेगळी ओळख निर्माण केली आहे. त्यांचा प्रचंड लोकसंपर्क, कार्यकर्त्यांना सोबत घेऊन काम करण्याची शैली, संघटन वाढीसाठी असलेली तळमळ आणि पक्षनिष्ठा यामुळे त्या भारतीय जनता पक्षातील प्रभावी महिला नेतृत्व म्हणून ओळखल्या जातात.
घरातूनच सामाजिक कार्य, जनसेवा आणि राजकारणाचे संस्कार लाभलेल्या डॉ. सुप्रियाताई यांनी आपल्या कार्यकौशल्याच्या बळावर पक्ष संघटनेत विश्वासार्ह स्थान निर्माण केले आहे. आदिवासी समाजाच्या सर्वांगीण विकासासाठी त्यांची सातत्यपूर्ण धडपड, महिलांचे सक्षमीकरण, युवकांना संधी उपलब्ध करून देण्याचा प्रयत्न आणि जनहिताच्या विविध उपक्रमांमधील सक्रिय सहभाग यामुळे त्या कार्यकर्त्यांमध्ये विशेष लोकप्रिय आहेत.
भारतीय जनता पक्षाने त्यांच्यावर सोपविलेली महाराष्ट्र प्रदेश उपाध्यक्ष ही महत्त्वपूर्ण जबाबदारी त्या आपल्या प्रामाणिकपणा, नेतृत्व क्षमता आणि संघटन कौशल्याच्या जोरावर यशस्वीपणे पार पाडतील, तसेच राज्यभर अनुसूचित जमाती मोर्चा अधिक सक्षम, गतिमान आणि प्रभावी करण्यासाठी मोलाचे योगदान देतील, असा विश्वास पक्षाच्या वरिष्ठ नेत्यांसह कार्यकर्त्यांनी व्यक्त केला आहे.
ही नियुक्ती भारतीय जनता पक्षाच्या अनुसूचित जमाती मोर्चाचे प्रदेशाध्यक्ष डॉ. देवराव होळी यांच्या स्वाक्षरीने जारी करण्यात आली आहे.
डॉ. सुप्रियाताई गावित यांच्या या नियुक्तीमुळे नंदुरबार जिल्ह्याच्या राजकीय नेतृत्वाचा राज्य पातळीवरील प्रभाव अधिक दृढ झाल्याची भावना कार्यकर्त्यांमध्ये व्यक्त होत आहे. गावित परिवाराने अनेक दशकांपासून जनसेवा, विकास आणि आदिवासी समाजाच्या उन्नतीसाठी दिलेले योगदान हे कार्यकर्त्यांसाठी प्रेरणादायी असून, या परिवाराच्या सक्षम नेतृत्वाचा प्रत्येक भाजप कार्यकर्त्याला अभिमान असल्याची भावना विविध स्तरांतून व्यक्त केली जात आहे.
डॉ. सुप्रियाताई गावित यांच्यावर सोपविण्यात आलेल्या या महत्त्वपूर्ण जबाबदारीमुळे भारतीय जनता पक्षाच्या संघटनात्मक बळकटीला नवी ऊर्जा मिळेल, तसेच राज्यातील अनुसूचित जमाती समाजाचे प्रश्न अधिक प्रभावीपणे मांडले जातील, असा विश्वास व्यक्त करत नंदुरबारसह संपूर्ण नाशिक विभागातून त्यांच्यावर अभिनंदनाचा वर्षाव होत आहे.