शहादा | प्रतिनिधी
धडगावहून सावऱ्यादिगर-बुरखेडा पाड्याकडे जाणाऱ्या चारचाकी वाहनाचा काल तीव्र वळणाच्या उतारावर भीषण अपघात होऊन तब्बल २१ प्रवासी जखमी झाले. या अपघाताने संपूर्ण परिसर हादरला असून, जखमींच्या नातेवाईकांमध्ये चिंतेचे वातावरण निर्माण झाले आहे.
सावऱ्यादिगर गावाजवळील धोकादायक वळणावर चालकाचे वाहनावरील नियंत्रण सुटल्याने चारचाकी वाहन रस्त्यावरच पलटी झाले. अपघाताची तीव्रता एवढी होती की, अनेक प्रवाशांना गंभीर दुखापत झाली. एका प्रवाशाचा पाय फ्रॅक्चर झाला असून, तीन जणांची प्रकृती चिंताजनक असल्याची प्राथमिक माहिती आहे. जखमींना तत्काळ धडगाव ग्रामीण रुग्णालयात दाखल करण्यात आले. त्यापैकी काही जखमींना पुढील उपचारासाठी शहादा येथील रुक्मिणी हॉस्पिटलमध्ये हलविण्यात आले आहे.
या पार्श्वभूमीवर आज जिल्हा परिषदेचे माजी सभापती तथा राष्ट्रवादी काँग्रेस पार्टीचे प्रदेश सरचिटणीस मा. श्री. रतनदादा पाडवी यांनी रुक्मिणी हॉस्पिटलमध्ये जाऊन अपघातातील जखमींची आस्थेने विचारपूस केली. यावेळी त्यांनी डॉक्टरांकडून जखमींच्या प्रकृतीची माहिती घेतली तसेच त्यांच्या नातेवाईकांशी संवाद साधून त्यांना धीर दिला.
यावेळी जिल्हा सोशल मीडिया अध्यक्ष व जिल्हा उपाध्यक्ष छोटूभाऊ कुवर, माजी पंचायत समिती सदस्य ठाणशिंग पावरा यांच्यासह राष्ट्रवादी काँग्रेस पार्टीचे पदाधिकारी, कार्यकर्ते व स्थानिक नागरिक उपस्थित होते.
अपघाताची माहिती मिळताच स्थानिक नागरिक आणि नातेवाईकांनी घटनास्थळी धाव घेत जखमींना मदत केली. जखमींना रुग्णालयात दाखल केल्यानंतर त्यांच्या नातेवाईकांची मोठी गर्दी झाली. आपल्या आप्तस्वकीयांच्या प्रकृतीची चिंता, रुग्णालयातील धावपळ आणि नातेवाईकांचा आक्रोश यामुळे वातावरण अत्यंत भावूक झाले होते.
अशा कठीण प्रसंगी जखमींच्या पाठीशी उभे राहत रतनदादा पाडवी यांनी रुग्णालयात जाऊन प्रत्येक जखमीची आपुलकीने विचारपूस केली. त्यांच्या भेटीमुळे संकटाच्या काळात असलेल्या जखमी आणि त्यांच्या कुटुंबीयांना मानसिक आधार मिळाला.
अपघातातील जखमींमध्ये गिता चंद्रसिंग पावरा, रायदास पावरा, सोनहि मोहन पावरा, दिनेश भोग्या भिल, जितान पावरा, रतन जोरदार पावरा, चिकला किला पावरा, किसन सान्या पावरा, दांड्या जान्या पावरा, जया टेकला पावरा, रुईला दमन्या पावरा, मगन पाडवी, सांगा पावरा, टेट्या पावरा, गिदार पावरा, जितेंद्र पावरा, केला पावरा, वंदना पावरा, सुनिल पावरा, गुंड्या पावरा, रोहिदास पावरा आणि शांतिलाल पावरा यांचा समावेश आहे.
दरम्यान, अपघातानंतर वाहनचालक वाहन घटनास्थळी सोडून फरार झाल्याची माहिती असून, या प्रकरणाची संबंधित यंत्रणेकडून चौकशी सुरू आहे. जखमींवर आवश्यक ते उपचार सुरू असून, सर्व जखमी लवकरात लवकर सुखरूप बरे व्हावेत, अशी भावना परिसरातून व्यक्त होत आहे.