होळ तर्फे रणाळा (प्रतिनिधी) नंदुरबार तालुक्यातील होळ तर्फे रणाळा येथे अक्का माय फाउंडेशन, नंदुरबार यांच्या वतीने ग्रामस्थांना पाणी जारचे वितरण करण्यात आले. सामाजिक बांधिलकी जपत नागरिकांना स्वच्छ पिण्याचे पाणी उपलब्ध व्हावे, या उद्देशाने हा उपक्रम राबविण्यात आला.

फाउंडेशनचे अध्यक्ष श्री. विजय पाटील यांच्या पुढाकारातून हा उपक्रम घेण्यात आला. गावातील नागरिकांना विशेषतः उन्हाळ्यात तसेच दैनंदिन वापरासाठी स्वच्छ पिण्याचे पाणी सहज उपलब्ध व्हावे, हा या उपक्रमामागील मुख्य उद्देश होता.

विजय पाटील यांचा सामाजिक उपक्रमांचा सातत्यपूर्ण सहभाग

श्री. विजय पाटील हे आपल्या गावासाठी सामाजिक बांधिलकीच्या भावनेतून विविध उपक्रम राबवत असून, गरजू नागरिकांना तसेच शैक्षणिक संस्थांना वेळोवेळी मदतीचा हात देत आहेत. मागील वर्षीही त्यांनी जिल्हा परिषद शाळा तसेच हेमराज बाबुराव पाटील माध्यमिक विद्यालय, होळ तर्फे रणाळा यांना शालेय साहित्य, ग्रीन बोर्ड आणि पंखे भेट दिले होते.

या पाणी जार वितरण उपक्रमामुळे ग्रामस्थांना मोठा दिलासा मिळाला असून, सामाजिक संस्थांनी गावाच्या मूलभूत गरजांकडे लक्ष देत अशा प्रकारचे उपक्रम राबवावेत, अशी अपेक्षाही यावेळी व्यक्त करण्यात आली.

कार्यक्रमाला मनसाराम पाटील, सुनील पाटील, सुयोग पाटील, रुपेश पाटील, पावबा पाटील, ज्येष्ठ ग्रामस्थ शिवाजी पाटील, शांताराम पाटील, बाजीराव पाटील यांच्यासह गावातील तरुण मोठ्या संख्येने उपस्थित होते.

ग्रामस्थांनी अक्का माय फाउंडेशनच्या या सामाजिक उपक्रमाचे स्वागत करत फाउंडेशनचे अध्यक्ष विजय पाटील यांचे आभार मानले.