‘दुर्गा दौड’मधे डॉ. विजयकुमार गावित यांचा उत्साही सहभाग; श्रद्धा व राष्ट्रप्रेमाचा संगम
नंदुरबार (प्रतिनिधी)
नवरात्रोत्सवाच्या पावन पर्वावर श्री शिव प्रतिष्ठान हिंदुस्थान, नंदुरबार विभाग आयोजित पारंपरिक ‘दुर्गा दौड’ यंदाही जयघोष, भक्ती आणि राष्ट्रभक्तीच्या गजरात पार पडली. या प्रेरणादायी सोहळ्यात राज्याचे माजी आदिवासी विकास मंत्री तथा विद्यमान आमदार डॉ. विजयकुमार गावित आणि माजी जिल्हा परिषद अध्यक्षा डॉ. सुप्रिया गावित यांनी उत्स्फूर्त सहभाग नोंदवत तरुणांना नवचैतन्याचा संदेश दिला.
विशेष म्हणजे, डॉ. विजयकुमार गावित व डॉ. सुप्रिया गावित यांनी कार्यकर्त्यांसमवेत धर्मध्वज हाती घेऊन बरेच अंतर चालत उपस्थिती लक्षणीय ठरवली. त्यांच्या सहभागामुळे या दौडीचे आकर्षण अधिक वाढले.
दौडीची सुरुवात ग्रामदैवत आई खोडाईमाता मंदिरात महाआरतीने झाली. मंत्रोच्चार, शंखध्वनी व भक्तीमय स्तोत्रांनी वातावरण मंगलमय झाले. त्यानंतर सर्व सहभागी मंडळींनी एकत्र येऊन ‘वंदे मातरम्’ आणि राष्ट्रगीताचे सामूहिक गायन केले. गगनभेदी घोषणांनी व भगव्या पताकांनी परिसर दुमदुमून गेला.
युवक-युवतींचा शिस्तबद्ध सहभाग, घोषणांचा उत्साह आणि राष्ट्रप्रेमाने भारलेले वातावरण यामुळे हा सोहळा केवळ एक दौड न ठरता श्रद्धा, संस्कृती आणि राष्ट्रभक्तीचा महाउत्सव ठरला. “नवरात्रीच्या पार्श्वभूमीवर दुर्गेच्या शक्तिरूपाचे स्मरण करून समाजात जागरूकता, संघटनशक्ती व राष्ट्राभिमानाचे बीज रोवणे हीच या दुर्गा दौडीची खरी यशस्वीता आहे,” अशा भावना डॉ. विजयकुमार गावित यांनी व्यक्त केल्या.
या वेळी श्री शिव प्रतिष्ठान हिंदुस्थानचे जिल्हाप्रमुख ठाकरे, सहप्रमुख नरेंद्र चौधरी, मयूर चौधरी, देवा कासार, नरेंद्र तांबोळी, भगवा ध्वजधारी मनीष मिस्त्री, राहुल मोरे, योगेश विसपुते यांच्यासह मोठ्या संख्येने धारकरी व नागरिक उपस्थित होते.