नंदुरबार (प्रतिनिधी):
जिल्हा परिषद प्रशासनातील विविध विभागात दीर्घकाळ सेवा देऊन सेवानिवृत्त होणाऱ्या कर्मचाऱ्यांचा सन्मान व्हावा तसेच सेवापुर्तीच्या दिवशीच त्यांना सर्व सेवाविषयक लाभ मिळावेत, या उद्देशाने जिल्हा प्रशासनाने नाविन्यपूर्ण उपक्रम सुरू केला आहे, अशी माहिती जिल्हा परिषदेचे मुख्य कार्यकारी अधिकारी नमन गोयल यांनी दिली.
जिल्हा परिषदेच्या याहा मोगी सभागृहात सामान्य प्रशासन विभागामार्फत जानेवारीअखेर सेवानिवृत्त झालेल्या वर्ग–३ व वर्ग–४ मधील कर्मचाऱ्यांचा सत्कार सोहळा आयोजित करण्यात आला होता. यावेळी उपस्थित कर्मचाऱ्यांना मार्गदर्शन करताना नमन गोयल बोलत होते. त्यांच्या संकल्पनेतून या उपक्रमाची सुरुवात करण्यात आली आहे.
श्री गोयल म्हणाले की, जिल्हा परिषद प्रशासनातील कर्मचारी आपल्या आयुष्यातील ३० ते ३५ वर्षे प्रामाणिकपणे सेवा देतात. अशा कर्मचाऱ्यांना सेवानिवृत्तीच्या वेळी सन्मानपूर्वक निरोप देणे हे प्रशासनाचे कर्तव्य आहे. या भावनेतूनच सेवापुर्तीच्या दिवशीच निवृत्तीवेतन, ग्रॅच्युइटीसह सर्व सेवाविषयक लाभांचे आदेश देण्याची व्यवस्था करण्यात आली आहे. त्यामुळे निवृत्त कर्मचाऱ्यांना विविध कार्यालयांत फिरावे लागणार नाही.
कार्यक्रमास प्रमुख पाहुणे म्हणून मुख्य कार्यकारी अधिकारी नमन गोयल, अतिरिक्त मुख्य कार्यकारी अधिकारी चंद्रकांत पवार, सामान्य प्रशासन विभागाचे उपमुख्य कार्यकारी अधिकारी गणेश मोरे, ग्रामपंचायत विभागाचे उपमुख्य कार्यकारी अधिकारी उदयकुमार कुसुरकर, मुख्य लेखा व वित्त अधिकारी प्रवीण देवरे, शिक्षणाधिकारी भानुदास रोकडे यांच्यासह सर्व विभागप्रमुख उपस्थित होते. कार्यक्रमाचे प्रास्ताविक गणेश मोरे यांनी केले.
यावेळी सेवानिवृत्त झालेले केंद्रप्रमुख श्रीमती ललिता भामरे, मुख्याध्यापक प्रभाकर ठाकरे, प्रयोगशाळा वैज्ञानिक अधिकारी यादव मोरे, प्राथमिक शिक्षक साहेबराव रजाळे, पंतू गावित, नरेंद्र कुवर, राजाराम पाटील, श्रीमती सुरेखा सोनवणे, मानसिंग वळवी, श्रीमती ललिता पावरा, वरिष्ठ सहाय्यक रतिलाल चौरे व रतिलाल गावित यांचा मुख्य कार्यकारी अधिकारी नमन गोयल यांच्या हस्ते स्मृतिचिन्ह, शाल व वृक्षारोपण देऊन सन्मान करण्यात आला. तसेच सेवापुर्ती निमित्त कर्मचाऱ्यांना मिळणाऱ्या सर्व सेवाविषयक लाभांचे आदेश तत्काळ देण्यात आले.
सेवानिवृत्त केंद्रप्रमुख श्रीमती ललिता भामरे व शिक्षक पंतू गावित यांनी मनोगतातून जिल्हा परिषद प्रशासनाच्या या उपक्रमाचे कौतुक केले. सेवापुर्तीनंतर लगेचच सेवाविषयक लाभ मिळाल्याने निवृत्तीनंतरची धावपळ थांबेल व निवृत्तीवेतन वेळेवर सुरू होणार असल्याबद्दल त्यांनी प्रशासनाचे आभार मानले. कार्यक्रमाचे सूत्रसंचालन व आभार प्रदर्शन सुनील पाटील सर यांनी केले.