नंदुरबार (प्रतिनिधी) नंदुरबार जिल्ह्यात अवैध दारूनिर्मितीविरोधात स्थानिक गुन्हे शाखेने मोठी कारवाई करत बनावट देशी दारू तयार करणारा कारखाना उद्ध्वस्त केला. या कारवाईत सुमारे 10 लाख 17 हजार 500 रुपये किमतीचा मुद्देमाल जप्त करण्यात आला असून एक आरोपीला अटक करण्यात आली आहे.
नंदुरबार जिल्ह्याच्या पोलीस अधीक्षक अश्विनी सानप यांनी जिल्ह्यातील अवैध दारूनिर्मिती, वाहतूक, साठवणूक, अंमली पदार्थ, अवैध शस्त्रे व इतर बेकायदेशीर धंद्यांवर प्रभावी कारवाई करण्याचे आदेश दिले होते. त्यानुसार स्थानिक गुन्हे शाखेचे पोलीस निरीक्षक हेमंत पाटील यांना गुप्त माहिती मिळाली की, जुगनी (ता. अक्कलकुवा) येथील दुगलीबारी पाड्यात एका घरात स्पिरीटच्या साहाय्याने बनावट देशी दारू तयार केली जात आहे.
मिळालेल्या माहितीच्या आधारे स्थानिक गुन्हे शाखेच्या पथकाने संबंधित ठिकाणी छापा टाकला. एका कौलारू घराजवळ स्पिरीटचा तीव्र वास येत असल्याने पोलिसांनी घराची पाहणी केली. यावेळी एक इसम दारूच्या बाटल्यांमध्ये द्रव भरताना आढळून आला. पोलिसांनी त्याला ताब्यात घेऊन चौकशी केली असता त्याने आपले नाव लक्ष्मण हात्या पाडवी (वय 31, रा. तलावडी, पोस्ट धनाजे बु., ता. धडगाव) असे सांगितले.
घराची झडती घेतली असता पोलिसांना मोठ्या प्रमाणात बनावट देशी दारू, स्पिरीट आणि दारूनिर्मितीसाठी लागणारे साहित्य आढळून आले. कारवाईदरम्यान 39 बॉक्स बनावट देशी दारू, 150 लिटर स्पिरीट, बाटल्यांना बुच व पॅकिंग करणारे इलेक्ट्रिक मशीन, दारू तयार करण्यासाठी वापरले जाणारे साहित्य तसेच एक बोलेरो वाहन असा एकूण 10.17 लाख रुपयांचा मुद्देमाल जप्त करण्यात आला.
या प्रकरणी आरोपीविरुद्ध म्हसावद पोलीस ठाण्यात गुन्हा क्रमांक 229/2026 अन्वये भारतीय न्याय संहिता 2023 च्या कलम 123 तसेच महाराष्ट्र दारुबंदी कायदा कलम 65(इ) अंतर्गत गुन्हा दाखल करण्यात आला आहे. ही कारवाई पोलीस अधीक्षक अश्विनी सानप व अपर पोलीस अधीक्षक आशित कांबळे यांच्या मार्गदर्शनाखाली स्थानिक गुन्हे शाखेचे पोलीस निरीक्षक हेमंत पाटील, पोलीस उपनिरीक्षक विकास गुंजाळ, मुकेश पवार तसेच त्यांच्या पथकाने यशस्वीरीत्या पार पाडली.
या धडक कारवाईमुळे जिल्ह्यातील अवैध दारूनिर्मिती करणाऱ्यांमध्ये खळबळ उडाली असून पोलीस प्रशासनाने अशा बेकायदेशीर व्यवसायांवर पुढेही कठोर कारवाई सुरू ठेवण्याचा इशारा दिला आहे.