स्थानिक गुन्हे शाखेची दमदार कारवाई; पोलीस निरीक्षक हेमंत पाटील यांच्या नेतृत्वाखाली आणखी एक मोठे यश
नंदुरबार : जिल्ह्यातील वाढत्या सोनसाखळी चोरीच्या घटनांना आळा घालण्यासाठी नंदुरबार पोलीस दलाने मोठी कामगिरी करत आंतरराज्यीय सोनसाखळी चोरट्यांच्या टोळीचा पर्दाफाश केला आहे. स्थानिक गुन्हे शाखेने दोन आरोपींना अटक करून नंदुरबार जिल्ह्यातील ५ आणि महाराष्ट्रासह कर्नाटकातील १३ असे एकूण १८ गुन्हे उघडकीस आणले असून ५ लाख ४३ हजार २०० रुपयांचा मुद्देमाल हस्तगत करण्यात आला आहे.
मागील काही महिन्यांपासून नंदुरबार शहर, उपनगर परिसर तसेच राज्यातील विविध भागांमध्ये धुमस्टाईल सोनसाखळी चोरीच्या घटना घडत होत्या. त्यामुळे नागरिकांमध्ये भीतीचे वातावरण निर्माण झाले होते. या गंभीर प्रकारांची दखल घेत जिल्हा पोलीस अधीक्षक श्रीमती अश्विनी सानप यांनी गुन्ह्यांचा छडा लावण्याचे स्पष्ट निर्देश स्थानिक गुन्हे शाखेला दिले होते.
या पार्श्वभूमीवर स्थानिक गुन्हे शाखेचे पोलीस निरीक्षक श्री. हेमंत पाटील यांनी अत्यंत बारकाईने तपासाची सूत्रे हातात घेतली. विविध जिल्ह्यांतील सीसीटीव्ही फुटेज, तांत्रिक माहिती, गुप्त बातमीदारांचे जाळे आणि गुन्हेगारांच्या कार्यपद्धतीचा सखोल अभ्यास करून त्यांनी तपासाला योग्य दिशा दिली. त्यांच्या नियोजनबद्ध मार्गदर्शनाखाली स्थानिक गुन्हे शाखेच्या पथकाने बीड येथे सापळा रचून राहुल राजाराम गायकवाड व अविनाश नवनाथ टिळकर या दोघांना ताब्यात घेतले.
चौकशीदरम्यान आरोपींनी नंदुरबार जिल्ह्यातील ५ सोनसाखळी चोरीचे गुन्हे कबूल केले. त्यांच्याकडून ४ लाख १८ हजार २०० रुपयांचे सोन्याचे दागिने आणि गुन्ह्यात वापरलेली १ लाख २५ हजार रुपयांची मोटारसायकल असा एकूण ५ लाख ४३ हजार २०० रुपयांचा मुद्देमाल जप्त करण्यात आला.
तपासादरम्यान आरोपींनी अकोला, अमरावती, जळगाव, अहिल्यानगर, सांगली, नाशिक, छत्रपती संभाजीनगर तसेच कर्नाटकातील बेळगाव येथे देखील अशाच प्रकारचे गुन्हे केल्याची कबुली दिली. पडताळणीत महाराष्ट्र व कर्नाटकातील आणखी १३ गुन्हे उघडकीस आले. यामुळे या टोळीचा मोठा गुन्हेगारी नेटवर्क उघड झाला आहे.
हेमंत पाटील यांच्या नेतृत्वाखाली गुन्हेगारांवर वचक
नंदुरबार जिल्ह्यात स्थानिक गुन्हे शाखेचे पोलीस निरीक्षक श्री. हेमंत पाटील यांनी पदभार स्वीकारल्यानंतर अनेक गंभीर गुन्ह्यांचा यशस्वी तपास लावण्यात आला आहे. अवैध धंद्यांवर कारवाई, अंमली पदार्थविरोधी मोहिमा, चोरी व दरोड्यांचे गुन्हे उघड करणे तसेच जिल्ह्यातील कायदा व सुव्यवस्था अबाधित ठेवण्यासाठी त्यांनी सातत्याने प्रभावी कामगिरी केली आहे. त्यांच्या नेतृत्वाखाली स्थानिक गुन्हे शाखेने अनेक आव्हानात्मक गुन्ह्यांची उकल करून नागरिकांमध्ये सुरक्षिततेची भावना निर्माण केली आहे.
सोनसाखळी चोरीसारख्या गंभीर आणि आव्हानात्मक गुन्ह्यांचा छडा लावत आरोपींना जेरबंद करण्यात स्थानिक गुन्हे शाखेला मिळालेले हे यश नंदुरबार पोलीस दलासाठी महत्त्वपूर्ण मानले जात आहे. या उत्कृष्ट कामगिरीबद्दल जिल्हा पोलीस अधीक्षक श्रीमती अश्विनी सानप यांनी पोलीस निरीक्षक हेमंत पाटील व त्यांच्या संपूर्ण पथकाचे अभिनंदन केले आहे.
ही कारवाई अपर पोलीस अधीक्षक श्री. आशित कांबळे यांच्या मार्गदर्शनाखाली पोलीस निरीक्षक हेमंत पाटील, पोलीस उपनिरीक्षक मुकेश पवार, विकास गुंजाळ, पोलीस हवालदार मुकेश तावडे, मनोज नाईक, मोहन ढमढेरे, अभय राजपूत, आनंदा मराठे आदींच्या पथकाने यशस्वीपणे पार पाडली.