नंदुरबार (प्रतिनिधी) शताब्दी इन्स्टिट्यूट ऑफ फार्मसी, नंदुरबार येथे दिनांक १३ डिसेंबर २०२५ रोजी नवप्रवेशित विद्यार्थ्यांसाठी इंडक्शन प्रोग्राम तसेच पालक सभा यशस्वीरीत्या पार पडली.
हा कार्यक्रम प्राचार्य प्रा. पंकज एम. चौधरी यांच्या मार्गदर्शनाखाली आयोजित करण्यात आला. यावेळी मार्गदर्शन करताना प्राचार्य चौधरी यांनी नवप्रवेशित विद्यार्थ्यांनी शिस्त, सातत्यपूर्ण अभ्यास व नैतिक मूल्यांचा अंगीकार करून आपले शैक्षणिक तसेच वैयक्तिक जीवन घडवावे, असे आवाहन केले. पालक व संस्था यांच्यातील योग्य समन्वयातूनच विद्यार्थ्यांचा सर्वांगीण विकास साध्य होऊ शकतो, असेही त्यांनी नमूद केले. इंडक्शन प्रोग्रामच्या माध्यमातून विद्यार्थ्यांना महाविद्यालयाची शैक्षणिक रचना, नियमावली, अभ्यासक्रम व विविध उपक्रमांची सविस्तर माहिती देण्यात आली. फार्मसी शिक्षणाचे महत्त्व, शिस्तीचे पालन आणि अभ्यासासोबत नैतिक मूल्ये जपण्याचे महत्त्व प्रा. तश्विता मगरे यांनी आपल्या मार्गदर्शनपर भाषणातून स्पष्ट केले.
या कार्यक्रमास पालकवर्ग, शिक्षक व शिक्षकेतर कर्मचारी मोठ्या संख्येने उपस्थित होते. पालक सभेमध्ये पालकांनी उत्स्फूर्त सहभाग नोंदविला. यावेळी पालक श्री. अशोक बोरसे यांनी आपले मनोगत व्यक्त करत संस्थेच्या शैक्षणिक कार्यपद्धतीचे कौतुक केले. विद्यार्थ्यांच्या सर्वांगीण विकासासाठी संस्था सातत्याने प्रयत्नशील असल्याचे यावेळी नमूद करण्यात आले. कार्यक्रमाच्या यशस्वी आयोजनासाठी सांस्कृतिक समितीने विशेष परिश्रम घेतले. समितीमध्ये प्रा. कल्याणी चौधरी, प्रा. जागृती शेवाळे, प्रा. पूजा गायकवाड, प्रा. भावना वसावे, प्रा. रोहिणी पाटील व प्रा. श्रद्धा पाटील यांचा समावेश होता.
कार्यक्रमाच्या शेवटी संस्थेच्या अध्यक्षा योगीता गणेश पाटील व सचिव गणेश गोविंद पाटील यांनी विद्यार्थ्यांना शुभेच्छा देत त्यांच्या उज्ज्वल भविष्यासाठी मार्गदर्शन व कौतुक केले.