नंदुरबार (प्रतिनिधी)
भारतातील आरोग्यसेवेच्या डिजिटल आणि प्रतिबंधात्मक प्रवासात मोठे पाऊल उचलत विदाल हेल्थ आणि सिरम इन्स्टिट्यूट ऑफ इंडिया (एसआयआय) प्रा. लि. यांनी एचपीव्ही लसीकरणासाठी महत्त्वपूर्ण भागीदारी जाहीर केली आहे. या उपक्रमाचा उद्देश गर्भाशयाच्या मुखाच्या कर्करोगाविषयी जनजागृती वाढवणे आणि लस अधिक सुलभ करणे हा आहे.
दि. १ ऑक्टोबर २०२५ पासून विदाल हेल्थचा डिजिटल प्लॅटफॉर्म हा देशातील पहिला असा प्लॅटफॉर्म ठरणार आहे, जिथे एचपीव्ही लसीसाठी सर्वकष (एंड-टू-एंड), कागदपत्रविरहित आणि कॅशलेस सुविधा उपलब्ध होईल. डॉक्टरची वेळ ठरवणे, संमतीपत्र भरणे, प्रमाणपत्र मिळवणे, डोसची आठवण करून देणे आणि उपचारांचे पालन या सर्व प्रक्रिया डिजिटल माध्यमातून पूर्ण केल्या जाणार आहेत.
बजाज फिनसर्व्ह हेल्थची १००% मालकी असलेल्या विदाल हेल्थच्या या उपक्रमाबाबत बजाज फिनसर्व्हचे अध्यक्ष व व्यवस्थापकीय संचालक संजीव बजाज म्हणाले, “भारतातील आरोग्यसेवा आता उपचारांपेक्षा प्रतिबंधात्मक सेवांकडे झुकत आहे. आयुष्मान भारतसारख्या योजनांमुळे हे परिवर्तन वेगाने घडत आहे. सिरम इन्स्टिट्यूटसोबतची भागीदारी ही आमच्या लसीकरण उपक्रमाची सुरुवात आहे. यामुळे लोकांना दीर्घकालीन आरोग्य खर्च वाचविण्यास मदत होईल.”
सिरम इन्स्टिट्यूट ऑफ इंडियाचे मुख्य कार्यकारी अधिकारी आदर पूनावाला यांनी सांगितले, “गर्भाशयाच्या मुखाच्या कर्करोगाच्या प्रतिबंधासाठी एचपीव्ही लस अत्यंत महत्त्वाची आहे. मात्र, तिचा प्रभाव वाढवण्यासाठी व्यापक उपलब्धता आणि जनजागृती गरजेची आहे. विदाल हेल्थसोबतची भागीदारी यात महत्त्वाची भूमिका बजावेल.” विदाल हेल्थकेअर सर्व्हिसेस लि.च्या कार्यकारी संचालिका नीथा उत्तय्या यांनी म्हटले की, “संपूर्णपणे व्यवस्थापित या उपक्रमाद्वारे भारतात वाढत चाललेला हॉस्पिटलायझेशन व वैद्यकीय खर्च कमी करण्याचा आमचा प्रयत्न आहे. हा प्रकल्प आरोग्यसेवा प्रदाते, लस उत्पादक आणि राष्ट्रीय डिजिटल प्लॅटफॉर्म्स यांना एकत्र आणणारा आहे.”
सध्या विदाल हेल्थचा प्लॅटफॉर्म डॉक्टरांचा सल्ला, नैदानिक चाचण्या, आरोग्य तपासण्या, वेलनेस कार्यक्रम आणि वित्तीय आरोग्यसेवा पुरवतो. आता एचपीव्ही लसीकरणाची सुविधा थेट डिजिटल पद्धतीने मिळणार असून, आरोग्यसेवेकडे पाहण्याच्या दृष्टिकोनात हा उपक्रम महत्वाचा टप्पा मानला जात आहे.