स्थानिक गुन्हे शाखा, उपविभागीय पोलीस अधिकारी कार्यालय आणि शहर पोलिसांची संयुक्त कारवाई; तांत्रिक व गोपनीय माहितीच्या आधारे आरोपीला नंदुरबार-नवापूर मार्गावरून ताब्यात
नंदुरबार : जिल्ह्यात वाढत्या मालमत्तेविषयक गुन्ह्यांना आळा घालण्यासाठी नंदुरबार जिल्हा पोलिसांनी राबविलेल्या विशेष मोहिमेला मोठे यश मिळाले आहे. स्थानिक गुन्हे शाखा, उपविभागीय पोलीस अधिकारी कार्यालय आणि नंदुरबार शहर पोलीस ठाण्याच्या संयुक्त पथकाने धुळे येथील सराईत असल्याचे पोलिसांच्या नोंदीत असलेल्या एका संशयित आरोपीला ताब्यात घेतले असून, त्याच्याकडून नंदुरबार जिल्ह्यातील घरफोडीचे तब्बल चार गुन्हे उघडकीस आणण्यात यश आले आहे. या कारवाईत पोलिसांनी तब्बल 10 लाख 02 हजार 126 रुपये किमतीचा मुद्देमाल हस्तगत केला आहे.
जिल्ह्यातील मालमत्तेविषयक गुन्ह्यांचा वाढता आलेख लक्षात घेऊन पोलीस अधीक्षक श्रीमती अस्विनी सानप यांनी मासिक गुन्हे आढावा बैठकीत घरफोडी व चोरीच्या गुन्ह्यांवर कठोरपणे नियंत्रण मिळविण्याचे निर्देश दिले होते. गुन्हे उघडकीस आणण्यासोबतच चोरीस गेलेला मुद्देमाल हस्तगत करून अशा घटनांना प्रतिबंध करण्यासाठी प्रभावी उपाययोजना करण्याच्या सूचना त्यांनी स्थानिक गुन्हे शाखेसह सर्व पोलीस ठाण्यांच्या प्रभारी अधिकाऱ्यांना दिल्या होत्या.
या निर्देशांची तातडीने अंमलबजावणी करत स्थानिक गुन्हे शाखेचे पोलीस निरीक्षक श्री. हेमंत पाटील यांनी जिल्ह्यात दाखल असलेल्या मालमत्तेविषयक गुन्ह्यांचा सखोल अभ्यास सुरू केला. विविध गुन्ह्यांची पद्धत, घटनास्थळे आणि संशयितांची माहिती तपासताना नंदुरबार शहर व शहादा पोलीस ठाण्याच्या हद्दीत घडलेल्या काही घरफोड्यांमध्ये साम्य असल्याचे पोलिसांच्या निदर्शनास आले.
यानंतर स्थानिक गुन्हे शाखा, उपविभागीय पोलीस अधिकारी कार्यालय आणि नंदुरबार शहर पोलीस ठाण्याचे विशेष पथक तयार करण्यात आले. या पथकाने तांत्रिक माहिती, गोपनीय सूत्रे आणि उपलब्ध गुन्हेगारी अभिलेखांच्या आधारे संशयितांचा शोध सुरू केला. नंदुरबारसह शहादा तसेच गुजरात आणि मध्य प्रदेशातील संभाव्य हालचालींचाही तपास करण्यात आला.
गुप्त माहितीने तपासाला मिळाली निर्णायक दिशा
दरम्यान, 14 ऑगस्ट 2026 रोजी नंदुरबार उपविभागीय पोलीस अधिकारी श्री. हेमंत गायकवाड यांना गुप्त बातमीदारामार्फत महत्त्वाची माहिती मिळाली. 8 ऑगस्ट रोजी नंदुरबार शहर पोलीस ठाण्याच्या हद्दीतील पाटीलपाडा परिसरातील महाराणा प्रताप नगर येथे झालेल्या घरफोडीच्या घटनेशी धुळे येथील सराईत आरोपीचा संबंध असल्याची माहिती पोलिसांना मिळाली.
मिळालेल्या माहितीच्या आधारे विशेष पथकाने नंदुरबार ते नवापूर मार्गावरील विविध पाड्यांमध्ये संशयिताचा शोध सुरू केला. अखेर पोलिसांच्या पथकाच्या हाती एक संशयित इसम लागला. चौकशीत त्याने आपले नाव इम्रान शेख खालील शेख (वय 30, रा. अजमेरा नगर, खडीपेठी, धुळे, ह.मु. नंदुरबार) असे सांगितले.
पोलिसांनी त्याच्याकडे केलेल्या चौकशीत नंदुरबार शहर व शहादा परिसरातील घरफोडीच्या घटनांबाबत महत्त्वाची माहिती मिळाली. त्यानंतर कायदेशीर प्रक्रियेनुसार तपास पुढे नेत पोलिसांनी त्याच्याकडून 10 लाख 02 हजार 126 रुपये किमतीचा मुद्देमाल हस्तगत केला.
चार घरफोडीचे गुन्हे उघडकीस
पोलिसांच्या तपासात नंदुरबार शहर व शहादा पोलीस ठाण्याच्या हद्दीतील खालील चार गुन्ह्यांची उकल झाल्याचे समोर आले आहे—
- नंदुरबार शहर पोलीस ठाणे गु.र.नं. 744/2026 — BNS 331(4), 305
- नंदुरबार शहर पोलीस ठाणे गु.र.नं. 712/2026 — BNS 331(4), 305
- नंदुरबार शहर पोलीस ठाणे गु.र.नं. 762/2026 — BNS 331(4), 305
- शहादा पोलीस ठाणे गु.र.नं. 781/2026 — BNS 331(4), 331(5), 305
ताब्यातील आरोपीविरुद्ध धुळे, नंदुरबार आणि नाशिक ग्रामीण परिसरात यापूर्वीही मालमत्तेविषयक गुन्हे दाखल असल्याचे तपासात निष्पन्न झाल्याचे पोलिसांनी सांगितले आहे. नंदुरबार जिल्ह्यात आणखी काही गुन्ह्यांमध्ये त्याचा सहभाग आहे का, तसेच त्याचे अन्य साथीदार आहेत का, याचा तपास सध्या सुरू आहे.
गुन्हेगारीवर वॉच; पोलिसांच्या तपास पद्धतीचे कौतुक
या कारवाईत पोलिसांनी केवळ आरोपीला ताब्यात घेण्यापुरती मर्यादा न ठेवता गुन्ह्यांची पद्धत, तांत्रिक माहिती, गोपनीय सूत्रे आणि पूर्वीच्या गुन्हेगारी नोंदी यांचा समन्वय साधत तपासाला दिशा दिली. त्यामुळे एकाच कारवाईत चार घरफोडीचे गुन्हे उघडकीस आणण्यासोबतच चोरीस गेलेला लाखोंचा मुद्देमाल हस्तगत करण्यात पोलिसांना यश आले.
या कारवाईमुळे मालमत्तेविषयक गुन्हे करणाऱ्या गुन्हेगारांवर नंदुरबार पोलिसांची करडी नजर असून, जिल्ह्यातील नागरिकांच्या मालमत्तेच्या सुरक्षेबाबत पोलीस प्रशासन गंभीर असल्याचा संदेशही गेला आहे.
पोलीस अधीक्षक श्रीमती अस्विनी सानप यांनी सांगितले की, ताब्यातील आरोपीने नंदुरबार जिल्ह्यात आणखी काही गुन्हे केले आहेत का, याबाबत तपास सुरू आहे. तसेच त्याच्या संभाव्य साथीदारांचाही शोध घेण्यात येत असून, मालमत्तेविषयक गुन्ह्यांना प्रतिबंध करण्यासाठी पोलिसांची कारवाई यापुढेही अधिक प्रभावीपणे सुरू राहणार आहे.
या पथकाची उल्लेखनीय कामगिरी
पोलीस अधीक्षक श्रीमती अस्विनी सानप, अपर पोलीस अधीक्षक श्री. अशित कांबळे आणि उपविभागीय पोलीस अधिकारी श्री. हेमंत गायकवाड यांच्या मार्गदर्शनाखाली स्थानिक गुन्हे शाखेचे पोलीस निरीक्षक श्री. हेमंत पाटील, पोलीस उपनिरीक्षक प्रमोद चव्हाण, सहायक पोलीस उपनिरीक्षक प्रवीण वायकर, पोलीस हवालदार राकेश मोरे, भाऊसाहेब डमर, अमर राजपूत, मनोज महाजन, विनोद पाटील, सचिन वसावे, तसेच नंदुरबार शहर पोलीस ठाण्याचे पोलीस हवालदार विशाल नागरे आणि आनंद मराठे यांच्या पथकाने ही उल्लेखनीय कारवाई केली.
लाखोंचा मुद्देमाल हस्तगत करून चार घरफोडीच्या गुन्ह्यांची उकल करणाऱ्या नंदुरबार पोलिसांच्या या कारवाईचे नागरिकांकडून कौतुक होत असून, आगामी काळातही अशाच प्रभावी कारवायांची अपेक्षा व्यक्त केली जात आहे.