मतदार यादी विशेष पुनरिक्षण मोहिमेसाठी नंदुरबार जिल्ह्यात मदत कक्ष कार्यरत
विधानसभा मतदारसंघनिहाय संपर्क क्रमांक जाहीर; नागरिकांना थेट संपर्काचे आवाहन
नंदुरबार | प्रतिनिधी
भारत निवडणूक आयोगाच्या निर्देशानुसार आणि भारतीय संविधानाच्या कलम 324 अन्वये राज्यभर राबविण्यात येत असलेल्या मतदार यादी विशेष सखोल पुनरिक्षण (Special Intensive Revision-2026) मोहिमेअंतर्गत नंदुरबार जिल्ह्यातील नागरिकांच्या सोयीसाठी जिल्हाधिकारी कार्यालयासह सर्व विधानसभा मतदारसंघांमध्ये विशेष मदत कक्ष (हेल्प डेस्क) सुरू करण्यात आले आहेत. या मदत कक्षांच्या माध्यमातून मतदार यादीशी संबंधित माहिती, अडचणी आणि तक्रारींचे त्वरित निराकरण करण्यात येणार असल्याची माहिती उपजिल्हा निवडणूक अधिकारी कल्पना ठुबे यांनी शासकीय प्रसिद्धीपत्रकाद्वारे दिली.
भारत निवडणूक आयोगाच्या निर्देशानुसार राज्यात मतदार याद्यांचा विशेष सखोल पुनरिक्षण कार्यक्रम राबविण्यात येत असून, त्याची प्रभावी आणि पारदर्शक अंमलबजावणी करण्यासाठी जिल्ह्यातील प्रत्येक विधानसभा मतदारसंघात तसेच संबंधित तहसील कार्यालयांत मदत कक्ष स्थापन करण्यात आले आहेत. मतदार यादीत नाव समाविष्ट करणे, दुरुस्ती, वगळणे, हरकती तसेच निवडणूक विषयक इतर माहिती व तक्रारींसाठी नागरिक या मदत कक्षांशी थेट संपर्क साधू शकतात.
विधानसभा मतदारसंघनिहाय मदत कक्ष व संपर्क क्रमांक पुढीलप्रमाणे आहेत :
• जिल्हाधिकारी कार्यालय, नंदुरबार (निवडणूक शाखा) : 02564-210008
• 01-अक्कलकुवा (तहसील कार्यालय, अक्कलकुवा) : 02567-252226
• अक्राणी (तहसील कार्यालय, अक्राणी) : 02595-220232
• 02-शहादा (तहसील कार्यालय, शहादा) : 9404442441 / 7666635390
• तळोदा (तहसील कार्यालय, तळोदा) : 02567-232367
• 03-नंदुरबार (तहसील कार्यालय, नंदुरबार) : 02564-232269
• 04-नवापूर (तहसील कार्यालय, नवापूर) : 02569-295282
उपजिल्हा निवडणूक अधिकारी कल्पना ठुबे यांनी जिल्ह्यातील सर्व पात्र मतदारांनी मतदार यादीच्या विशेष सखोल पुनरिक्षण मोहिमेचा लाभ घ्यावा आणि मतदार यादीसंदर्भात कोणतीही अडचण अथवा तक्रार असल्यास संबंधित मदत कक्षाशी संपर्क साधावा, असे आवाहन केले आहे. तसेच नागरिकांच्या सक्रिय सहभागातून ही मोहीम अधिक प्रभावी आणि यशस्वी होईल, असा विश्वासही त्यांनी व्यक्त केला आहे.