पळशी, ता. अक्कलकुवा (प्रतिनिधी) : जिल्हा परिषद केंद्र शाळा पळशी, शाळा व्यवस्थापन समिती व ग्रामपंचायत पळशी यांच्या संयुक्त विद्यमाने शैक्षणिक वर्ष २०२६-२७ च्या प्रारंभी शाळा प्रवेशोत्सव मोठ्या उत्साहात आणि आनंदी वातावरणात साजरा करण्यात आला.
प्रवेशोत्सवानिमित्त नव्याने प्रवेश घेतलेल्या विद्यार्थ्यांचे औक्षण व पूजन करून त्यांच्या पायांचे शुभ ठसे उमटवत शाळेत स्वागत करण्यात आले. तसेच विद्यार्थी व पालकांसाठी आकर्षक सेल्फी पॉईंटची उभारणी करण्यात आली होती. या सेल्फी पॉईंटवर विद्यार्थ्यांनी व पालकांनी आनंदाने छायाचित्रे काढून प्रवेशोत्सवाच्या आठवणी जतन केल्या.
यावेळी विद्यार्थ्यांना शालेय जीवनाबद्दल सकारात्मक भावना निर्माण व्हावी यासाठी विविध उपक्रमांचे आयोजन करण्यात आले. पहिल्याच दिवशी विद्यार्थ्यांना मोफत गणवेश व पाठ्यपुस्तकांचे वितरण करण्यात आले. नवागत विद्यार्थ्यांना फेटे बांधून गावातून भव्य शोभायात्रा काढण्यात आली. या शोभायात्रेत पालक, ग्रामस्थ, शिक्षक व विद्यार्थी मोठ्या संख्येने सहभागी झाले होते. शिक्षणाचे महत्त्व पटवून देत संपूर्ण गावात जनजागृती करण्यात आली.
या उपक्रमामुळे विद्यार्थ्यांमध्ये शाळेविषयी आत्मीयता, आपलेपणाची भावना आणि शिक्षणाबाबत उत्सुकता निर्माण झाली असून नवीन शैक्षणिक वर्षाची सुरुवात आनंददायी व प्रेरणादायी वातावरणात झाली.
कार्यक्रमाच्या यशस्वी आयोजनासाठी केंद्र मुख्याध्यापिका सरिता साबळे, शाळा व्यवस्थापन समिती अध्यक्ष संजय गांगुर्डे, सरपंच भालेराव कोकणी, सदस्य संतोष कोकणी, ग्रामपंचायत अधिकारी परमेश्वर गंडे, उपशिक्षक पुरुषोत्तम काळे, उपशिक्षिका सुलोचना वळवी, प्रभारी केंद्रप्रमुख कैलास सोनवणे, शाळा व्यवस्थापन समिती सदस्य, पालक व शिक्षकांनी विशेष परिश्रम घेतले. कार्यक्रमास ग्रामस्थांचा उत्स्फूर्त प्रतिसाद लाभला.