नंदुरबार, दि. ८ जून : सारंगखेडा परिसरात मागील काही महिन्यांपासून सुरू असलेल्या घरफोडीच्या घटनांचा छडा लावत स्थानिक गुन्हे शाखेने आंतरराज्यीय घरफोडी करणाऱ्या टोळीचा पर्दाफाश केला आहे. या कारवाईत तीन आरोपींना अटक करण्यात आली असून त्यांच्याकडून १७ लाख ३४ हजार ४९ रुपयांचा मुद्देमाल जप्त करण्यात आला आहे. तसेच चार घरफोडीचे गुन्हे उघडकीस आणण्यात पोलिसांना यश आले आहे. नंदुरबार येथे सोमवारी आयोजित पत्रकार परिषदेत जिल्हा पोलीस अधीक्षक श्रीमती अश्विनी सानप यांनी ही माहिती दिली.
सारंगखेडा पोलीस ठाणे हद्दीतील बोराळे गावात २९ मेच्या रात्री युवराज शंकर माळी व किशोर भरत पाटील यांच्या घरांचे मागील दरवाजे तोडून अज्ञात चोरट्यांनी ६ लाख १५ हजार २०० रुपयांचे सोने-चांदीचे दागिने व रोख रक्कम चोरून नेली होती. याप्रकरणी सारंगखेडा पोलीस ठाण्यात गुन्हा दाखल करण्यात आला होता. याशिवाय नांदरखेडा, फेस आणि तोरखेडा येथेही घरफोडीच्या घटना घडल्याने पोलिसांसमोर आरोपींचा शोध घेण्याचे मोठे आव्हान होते.
पोलीस अधीक्षक अश्विनी सानप यांच्या निर्देशानुसार स्थानिक गुन्हे शाखेचे पोलीस निरीक्षक हेमंत पाटील यांच्या नेतृत्वाखाली विशेष पथकाने तपास सुरू केला. १ जून रोजी जयनगर गावाजवळ विनानंबर युनिकॉर्न दुचाकीवर संशयास्पदरीत्या फिरणाऱ्या मिठाराम भावसिंग तडवी (वय ३४, रा. मुहाला, ता. सेंधवा, जि. बडवाणी, मध्यप्रदेश) याला ताब्यात घेण्यात आले.
चौकशीत तो सराईत गुन्हेगार असल्याचे निष्पन्न झाले. अधिक तपासात त्याने साथीदार रतला मालसिंग तडवी व जगदिश प्रताप तडवी यांच्या मदतीने सारंगखेडा परिसरात अनेक घरफोड्या केल्याची कबुली दिली. त्यानंतर पोलिसांनी त्याच्याकडून ५ लाख ८३ हजार ५० रुपयांचे सोन्याचे दागिने व एक लाख रुपयांची मोटारसायकल असा एकूण ६ लाख ८३ हजार ५० रुपयांचा मुद्देमाल जप्त केला.
यानंतर उर्वरित दोन्ही आरोपींनाही अटक करण्यात आली. तिन्ही आरोपींकडून एकूण ९९.६१ ग्रॅम वजनाचे १४ लाख ९४ हजार १५० रुपयांचे सोन्याचे दागिने, १ लाख ३९ हजार ८९९ रुपयांचे चांदीचे दागिने आणि गुन्ह्यात वापरलेली एक लाख रुपयांची मोटारसायकल असा एकूण १७ लाख ३४ हजार ४९ रुपयांचा मुद्देमाल हस्तगत करण्यात आला. या कारवाईमुळे सारंगखेडा पोलीस ठाण्यात दाखल असलेले गुन्हा क्रमांक ११०/२०२६, १२५/२०२६, १५७/२०२६ आणि १६०/२०२६ असे चार घरफोडीचे गुन्हे उघडकीस आले आहेत.
ही उल्लेखनीय कामगिरी पोलीस अधीक्षक अश्विनी सानप व अपर पोलीस अधीक्षक अशित कांबळे यांच्या मार्गदर्शनाखाली स्थानिक गुन्हे शाखा, सारंगखेडा पोलीस ठाणे तसेच मालमत्तेविरुद्ध तपास पथकातील अधिकारी व कर्मचाऱ्यांनी संयुक्तरीत्या पार पाडली.
पत्रकार परिषदेत पोलीस अधीक्षक अश्विनी सानप यांनी नागरिकांना घरफोडी रोखण्यासाठी दक्षता घेण्याचे आवाहन करताना संशयास्पद हालचाली आढळल्यास तातडीने पोलिसांना माहिती देण्याचे आवाहन केले.