शहादा (प्रतिनिधी) अवैधरित्या अंमली पदार्थांची वाहतूक करणाऱ्या दोन इसमांना शहादा पोलिसांनी धाडसी कारवाई करत ताब्यात घेतले असून त्यांच्या ताब्यातून तब्बल २० किलो ५६४ ग्रॅम सुका गांजा व दुचाकीसह एकूण ४ लाख ८१ हजार २८० रुपयांचा मुद्देमाल जप्त करण्यात आला आहे. या कारवाईमुळे परिसरात खळबळ उडाली आहे.
दि. १५ मे २०२६ रोजी शहादा पोलीस ठाण्याचे प्रभारी श्री. हेमंतकुमार पाटील यांना गोपनीय माहिती मिळाली होती की, दोन इसम धडगावकडून असलोद मार्गे शिरपूरकडे मोटारसायकलद्वारे सुका गांजा वाहतूक करत आहेत. या माहितीच्या आधारे श्री. पाटील यांनी तात्काळ पथकाला कारवाईचे आदेश दिले.
पोलीस पथकाने पंचांसह असलोद-दामळदा रोडवरील संस्थानजवळ सापळा रचला. रात्रीच्या सुमारास संशयित अवस्थेत लाल रंगाच्या मोटारसायकलवरून दोन इसम येताना दिसले. पोलिसांनी वाहन थांबवून चौकशी केली असता मोटारसायकल क्रमांक MH 03 BK 7511 असल्याचे निष्पन्न झाले. संशयितांनी आपली नावे १) सुशिल सुमा पावरा (वय ३०, रा. मोहिदा, ता. शिरपूर, जि. धुळे) व २) गजेंद्र जितेंद्र पावरा (वय २१, रा. मोहिदा, ता. शिरपूर, जि. धुळे) अशी सांगितली. त्यांच्या ताब्यातील बॅगांची तपासणी केली असता त्यामध्ये २० किलो ५६४ ग्रॅम वजनाचा सुका गांजा आढळून आला. पोलिसांनी गांजा, दुचाकी व इतर साहित्य असा एकूण ४,८१,२८० रुपयांचा मुद्देमाल जप्त केला आहे.
आरोपींकडे गांजा बाळगण्याबाबत कोणताही वैध परवाना नसल्याचे निष्पन्न झाल्याने त्यांच्याविरुद्ध शहादा पोलीस ठाण्यात गु.र.नं. ५५७/२०२६ अन्वये गुंगीकारक औषधी द्रव्य व मनोव्यापारावर परिणाम करणारे पदार्थ अधिनियम १९८५ चे कलम ८(क), २०(ब)(ii) प्रमाणे गुन्हा दाखल करण्यात आला असून पुढील तपास सुरू आहे.
ही कारवाई शहादा पोलीस ठाण्याचे प्रभारी श्री. हेमंतकुमार पाटील, सपोनि श्री. संदीप वाघ, असई अशोक कोळी, पोहेकॉ बहादुर भिलाला, पोशी भगवान सावळे, कपिल मंदील, विकास शिरसाठ, भरत शिंपी व मिथुन सिसोदे यांच्या पथकाने यशस्वीरीत्या पार पाडली.