नंदुरबार : शताब्दी इन्स्टिट्यूट ऑफ फार्मसी महाविद्यालयात भारतीय फार्मसीचे जनक महादेवलाल श्रॉफ तसेच हिंदवी स्वराज्याचे संस्थापक छत्रपती शिवाजी महाराज यांची जयंती मोठ्या उत्साहात आणि प्रेरणादायी वातावरणात साजरी करण्यात आली.
कार्यक्रमाची सुरुवात महाविद्यालयाचे प्राचार्य डॉ. पंकज चौधरी यांच्या हस्ते महादेवलाल श्रॉफ आणि छत्रपती शिवाजी महाराज यांच्या प्रतिमांना पुष्पहार अर्पण करून करण्यात आली. यावेळी उपस्थित प्राध्यापक, कर्मचारी आणि विद्यार्थ्यांनी महान व्यक्तिमत्त्वांना अभिवादन करून त्यांच्या कार्याची आठवण काढली.
यावेळी प्राध्यापकांनी विद्यार्थ्यांना संबोधित करताना भारतीय फार्मसी शिक्षणाच्या उभारणीत महादेवलाल श्रॉफ यांचे योगदान अत्यंत महत्त्वपूर्ण असल्याचे सांगितले. त्यांनी फार्मसी शिक्षणाला वैज्ञानिक दिशा देत देशातील औषधनिर्मिती क्षेत्राच्या प्रगतीस मोठी चालना दिली. त्यांच्या कार्यामुळे आज भारतात फार्मसी क्षेत्रात मोठी प्रगती होत असल्याचेही त्यांनी नमूद केले.
तसेच छत्रपती शिवाजी महाराजांच्या जयंतीनिमित्त त्यांच्या शौर्य, दूरदृष्टी, न्यायनिष्ठा आणि आदर्श राज्यकारभारावरही प्रकाश टाकण्यात आला. शिवाजी महाराजांनी स्वराज्याची संकल्पना प्रत्यक्षात उतरवून जनतेला सुरक्षित व न्यायपूर्ण राज्य दिले. त्यांचे जीवनकार्य आजच्या तरुण पिढीसाठी प्रेरणादायी असल्याचे यावेळी सांगण्यात आले.
कार्यक्रमात विद्यार्थ्यांनीही उत्स्फूर्त सहभाग घेतला. काही विद्यार्थ्यांनी शिवाजी महाराजांच्या पराक्रमाविषयी तसेच महादेवलाल श्रॉफ यांच्या कार्याविषयी आपले मनोगत व्यक्त केले. या कार्यक्रमामुळे विद्यार्थ्यांना महान व्यक्तिमत्त्वांच्या कार्याची ओळख झाली आणि त्यांच्याकडून प्रेरणा घेण्याची संधी मिळाली.
कार्यक्रमाच्या शेवटी विद्यार्थ्यांनी महान व्यक्तिमत्त्वांच्या आदर्शांचे पालन करून समाजाच्या प्रगतीसाठी योगदान देण्याचा संकल्प व्यक्त केला.
सदर कार्यक्रम यशस्वी होण्यासाठी महाविद्यालयातील सर्व शिक्षक व शिक्षकेतर कर्मचाऱ्यांचे सहकार्य लाभले. कार्यक्रमाच्या यशस्वी
आयोजनाबद्दल संस्थेच्या अध्यक्षा श्रीमती योगिता गणेश पाटील, सचिव श्री गणेश गोविंद पाटील तसेच महाविद्यालयाचे प्राचार्य डॉ. पंकज चौधरी यांनी सर्वांचे कौतुक केले.