नंदुरबार : महाराष्ट्र राज्य रुग्णसेवक व श्रमिक कामगार संघटनेच्या नंदुरबार जिल्हाध्यक्षपदी आकीब असलम धोबी यांची नियुक्ती करण्यात आली आहे. सामाजिक कार्यातील त्यांच्या उल्लेखनीय योगदानाची दखल घेत संघटनेने त्यांच्यावर ही महत्त्वाची जबाबदारी सोपविली आहे.
संघटनेचे प्रदेश उपाध्यक्ष सुरज एस. यादव यांनी दिलेल्या नियुक्तीपत्रानुसार, संस्थापक अध्यक्ष प्रवीण समाधान भोंटकर यांच्या आदेशानुसार ही नियुक्ती करण्यात आली आहे. रुग्णसेवा, सामाजिक बांधिलकी आणि श्रमिक कामगारांच्या हक्कांचे संरक्षण करण्यासाठी अधिक प्रभावीपणे कार्य करण्याच्या उद्देशाने आकीब धोबी यांची जिल्हाध्यक्षपदी निवड करण्यात आल्याचे नियुक्तीपत्रात नमूद करण्यात आले आहे.
संघटनेच्या नियमांचे व उद्दिष्टांचे पालन करत गरजू रुग्णांना मदत करणे, श्रमिक कामगारांच्या विविध समस्या सोडविण्यासाठी सातत्याने प्रयत्न करणे तसेच त्यांना न्याय मिळवून देण्यासाठी सक्रिय भूमिका बजावण्याची अपेक्षा संघटनेने व्यक्त केली आहे.
नियुक्तीनंतर आकीब असलम धोबी यांनी संघटनेने दाखविलेल्या विश्वासाबद्दल आभार व्यक्त करत, रुग्णसेवा आणि श्रमिक कामगारांच्या कल्याणासाठी प्रामाणिकपणे व निष्ठेने कार्य करण्याचा निर्धार व्यक्त केला.
दरम्यान, त्यांच्या नियुक्तीचे विविध सामाजिक, राजकीय, कामगार तसेच रुग्णसेवा क्षेत्रातील मान्यवरांनी स्वागत केले असून त्यांचे अभिनंदन करत पुढील कार्यासाठी शुभेच्छा दिल्या आहेत. त्यांच्या नेतृत्वामुळे नंदुरबार जिल्ह्यातील रुग्णसेवा आणि श्रमिक कामगारांच्या प्रश्नांना अधिक प्रभावीपणे न्याय मिळेल, असा विश्वासही यावेळी व्यक्त करण्यात आला.