नंदुरबार (प्रतिनिधी) – वंचित बहुजन आघाडीचे नंदुरबार जिल्ह्यातील प्रमुख युवा नेतृत्व आणि गेल्या चार–पाच वर्षांपासून पक्षाची जबाबदारी प्रभावीपणे सांभाळणारे युवा जिल्हाध्यक्ष सुनील भाऊ सूर्यवंशी यांनी आज शेकडो कार्यकर्त्यांसह भारतीय जनता पार्टीत जाहीर प्रवेश केला. या मोठ्या प्रवेशामुळे भाजपला जिल्ह्यातील युवा वर्गामध्ये अधिक बळ प्राप्त झाले असून वंचित बहुजन आघाडीसाठी हा मोठा राजकीय धक्का मानला जात आहे.
या प्रवेश सोहळ्यास माजी मंत्री व आमदार डॉ. विजयकुमार गावित हे प्रमुख अतिथी म्हणून उपस्थित होते. सुनील सूर्यवंशी यांच्या प्रवेशानंतर डॉ. गावित यांनी त्यांच्या कार्याची प्रशंसा करून त्यांचे मनापासून स्वागत केले. गेल्या काही वर्षांत सुनील सूर्यवंशी यांनी जिल्ह्यात मोठा जनसंपर्क वाढवत वंचित बहुजन आघाडीच्या संघटनात्मक वाढीमध्ये महत्त्वाची भूमिका बजावली होती. शाखा विस्तार, युवा संघटन उभारणी आणि सक्रिय कार्यपद्धतीमुळे ते युवकांमध्ये विशेष लोकप्रिय झाले होते आणि त्यांचे काम मुंबईपर्यंत पोहोचले होते.
या कार्यक्रमास भास्कर हिरामण पाटील (चेअरमन – भालेऱ येथील काकेश्वर विद्या प्रसारक संस्था), लोटन राजधर पाटील (सरपंच – कंढरे) यांच्यासह अनेक मान्यवर उपस्थित होते. त्यांच्या उपस्थितीत शेकडो कार्यकर्त्यांनी भाजपा ध्वज हाती घेऊन पक्षप्रवेश केला.
भाजपात प्रवेश करताना सुनील सूर्यवंशी म्हणाले, “युवा वर्गाला मुख्य प्रवाहात आणण्यासाठी आणि विकासाला गती देण्यासाठी भाजपची कार्यपद्धती योग्य आहे. नंदुरबार जिल्ह्याच्या सर्वांगीण प्रगतीसाठी आम्ही कटिबद्ध आहोत.” यावेळी त्यांनी पुढे बोलताना असा विश्वास व्यक्त केला की,
“माजी मंत्री आमदार विजयकुमार गावित, माजी खासदार हिनाताई गावित, प्रदेश महामंत्री विजय भाऊ चौधरी, जिल्हाध्यक्ष निलेश भाऊ माळी आणि आमदार राजेशदादा पाडवी यांच्या मार्गदर्शनाखाली आगामी काळात संपूर्ण जिल्हाभर काम करण्याची मौल्यवान संधी मला उपलब्ध होईल.” या प्रवेशामुळे भाजपचे नंदुरबारमधील संघटन अधिक बळकट होणार असून आगामी स्थानिक स्वराज्य संस्थांच्या निवडणुकांच्या पार्श्वभूमीवर हा प्रवेश पक्षासाठी लाभदायक ठरेल, असे राजकीय वर्तुळात चर्चिले जात आहे.